Страница 3 из 3
Послание
Ивану Ивановичу Третьякову
Послание
Иосифово к некоему велможе, зазираюшу ему на Иосифа о бывшей брани со
архиепископом Серапионом Великаго Новаграда и Пскова
(...) А
Божественая правила повелевают царя почитати, не сваритися с ним. Ни древний
святители дръзнуша сие сотворити, ни четыре патриарси, ни римский папа бывший
на вселенскых и помесных соборех. И аще когда царь и на гнев совратится на
кого, - и оне с кротостию и с смирением и со слезами моляху царя. И аще когда
прилунится на соборе слово кому святителю с царем или со князем, -преже умолят
царя, яко дабы повелел рещи. Егда ж повелеваше царь, глаголаху тогда со
смирением и с кротостию от божественых писаний, паче ж от священных правил.
(...)
И аз
(...) суду бил челом тому государю, которой (...) всем нам, общий государь, ино
всея Русский земля государем государь, которого Господь Бог устроил,
Вседрьжитель во свое место и посадил на царьском престоле, суд и милость
предасть ему и церковьное и монастырское и всего православного християньства
всея Руския земля власть и попечение вручил ему. И яз того ради таковаго
государя нашел, которого суд не посужается. Глаголеть бо в Божественых правилех,
яко царьский суд с святительским судом не посужается ни от кого же в древних
летех, ни в нынешних, ни в тамошних странах, ни в нашей Русстей земли, точию
един Серапион архиепископ говорил на соборе. (...) А Божественое писание
повелевает и простых людей не грабити неповинно.
Глаголеть
Божественный Златоуст: и князи и власти милование и заступление и правду
покажите на нищих людей господня ради страха, понеже суд жесток бывает на
великих, ниже сумнится лица всех владыка, ниже срамляется величия, понеже
малого и великого той сотворил, крепким же и сильным—крепко истязание ждет. И
аще не сохраните заповеди его, ни судите по правде, ниже по воли Божией ходите,
но уповайте на неправду и на восхищение жалаете, сего ради скоро и страшно на
вас приидет пагуба.
Зри, что
глаголет Божественный Златоуст, яко не сумнится лица всех владыка, ниже
срамляется величия, понеже малого и великого той сотвори есть - крепких же и
сильных крепко истязание ждеть, аще уповаете на неправду и на восхищение
желаете. (...)
Таково
осужение бывает, иже простыя человеки обидящим. А иже церкви Божия обидящим,
какова погибель будет, на преди о сем напишем. Занеже манастырь и церкви Божие
не может повинна быти никогда ж. Аще ли игумен или инок паде в согрешение, и
тем воздають по делом их. А того ни в древних царех, ни в князех православных,
ни в тамошних странах, ниже в нашей Русстей земли не бывало, что церкви Божия и
монастыри грабити, бояхуся бо ся Господа Бога, и иже от священных правил
положенные клятвы на обидящих Божия церкви.
Правило
святого вселенского собора 5-го 165 святых отец на обидящих святые Божие
церкви: иже аще кто явится, неистовствуя на святыя Божия церкви и на священная
их власти, даное от Богови в наследие вечных благ и на паметь последнего рода
или манастырем даное граблением и насилием дея, отьимаа от них всяко даное,
даемое Христови, и аще кто изобрящется се творя безчиние велие и святым
церквам, четверицею паки воздаст воспять церковьное, а не покоряюще же ся
истинным правилом святых отець, аще воевода - воеводства чюж или воин -
воиньетва чюж, и паки аще великим негодованием негодовати начнуть, забывше
вышнего страха и оболкшесь в бестудство - повелевает наша власть тех огнем
съжжещи, дом же их святым Божиим церквам вдати, их же обидеша. Аще ли и самый
венецьносящеи тоя ж вины последовати начнуть, надеющесь богатстве и
благородстве, а истоваго не радяще, не отдавающе же, их же обидеша святыя
церкви или манастыря, - прежереченной вине да повинни будуть по святых правилех
да будуть проклята в сии век и в будущий. (...)
И ты,
господине, поразсуди собе, яко не точию власть в землет Бог от иже церковьная и
манастырская восхищати желающих, но и душа отъемлет страшными лютыми муками.
Сего ради ведый известно Божественая писания великий самодерьжец государь
христолюбивый князь великий Василей Васильевич толико попечение имеаше о
Божественых церквах и о манастырех, яко ж ни малаго безчестия или обид
церковных презрети, но сих отмщати и не попущати сех обидети или бесчествовати.
(...)
Правильные
бо закони налагают проклятие на обидящих святые Божия церкви и манастыря, якож
зде речено есть Божественая писания сице глаголять: подобает убо всем
православным христьяном паче ж святителем и священником, вся творити же и
глаголати по свидетельству священных правил. А иже в небрежении полагают
священаа правила - под клятвою суть.
Глаголеть
бо ся в соборе соединения, иже быв при Констентине и Рамане царема; иже в
небрежении полагающе священная и Божественная правила Божественных отець наших,
иже святую церковь подпирают и все христьянское жительство украшающа
Божественному наставляят благоговеинству. Аще от сих кто небрежет - да будет
проклят. (...)
И ты,
господине, посмотри собе Божественая писания, каково отлучение и
неблагословение и не токмо отлучение и неблагословение положи, но и клятву и
проклятие на тех, иже в небрежение полагают священная правила. (...)
Послания
Иосифа Волоцкого. М. —Л.,
1956. С. 183—185, 187—208, 229—232, 235—236.
Только зарегистрированные пользователи могут оставлять комментарии. Пожалуйста авторизируйтесь или зарегистрируйтесь. Powered by AkoComment 2.0!
|