Страница 1 из 3
Послание
Иосифово к великому князю Ивану Васильевичю на еретика Кленова Государю
великому князю Ивану Васильевичю всея Русии нищий твой, господине, грешный
чернец Иосиф з братьею челом бью.
Что еси,
государь, прислал в монастырь Пречистые к нам еретика Семена Кленова, да и его
речи еретическиа написаны, что он мудръствовал, а велел еси его дръжать в
монастыре, ино государь, о том есмя обрадовалися были вси, что еси показал
ревность о благочестивей и православней християнстей вере, как прежний святии
православнии христианстии царие, а ныне, государь, сказали нам, что еретиков по
манастырем шлеш, ино, государь, нам нынешняя скорбь много горши первые, занеже,
государь, миряном ползу твориш, а иноком погибель. А в писании, государь, того
нет, кое еретиков по монастырем посылать: на всех, государь, соборех по
проклятии еретиков посылали в заточение, да сажали по темницам, а не в
монастыри посылали их. И который въсхощет покаятися, моему возможно и в темници
каятися: в скорбех бо и бедах и во юзах паче услышит бог кающихся сердцем
сокрушенным и смиренным.
Мнози,
государь, и православнии християне впадали в согрешения, да как почели каитися
о своих гресех, и они на себя клали сами - иной вериги железны, а иной чепь на
себе положил, а иной, государь, велел себя в погребе приковать чепью. И коли,
государь, захотели каятися истинно от сердца, и оне себе не пощедели, а и
согрешение их было не толь тяжко, да сами на муки себе предовати произвели. А
нынешний, государь, еретики сами не производили каятися, - как ты, государь,
почел их казнити смертными казнями, да и торговыми, и они, государь, почели
каятися мук деля, а не Бога ради, и как еси потщался очистить святую Божию
церковь от еретических скверн, так бы еси, государь, и о монастырех милость
покозал, чтобы не погибли от еретическаго зла.
А яз
тебе, государю моему, нищий твой з братьею, челом бью, и должни есмя Бога
молити о твоем здравии и спасении.
Отрывок
из послания Великому князю
Занеже,
государь, по подобию небесныа власти дал ти есть небесный царь скипетр земнаго
царствиа силы да человекы научиши правду хранити, и еже на ны бесовское
отженеши желание. Якоже кормьчий бдит всегда, тако и царьски многоочиты твой ум
сьдрьжит твердо добраго закона правило, иссушаа крепко безакониа потокы, да
корабль всемирныа жизни, сиречь всеблагаго царствиа твоего, не погрязнет
волнами неправды. Отврьзи, государь, царьскиа своа уши, в нищете стражющему, да
обрящеши Божий слух себе отверзень и Божиими присно просветившеся зарями богодарованнаа
твоа слава царскаа и бесконечныа векы славится и забвение имущих выше устроает.
Якоже страшное и всевидящее око небеснаго царя всех человек сердца зрит и
помышление веси, такоже и царское твое остроумие болшу имат всех силу: изрядне
управиши благое свое царствие, и страшен будеши сана ради и власти царскиа и
запретиши не на злобу обращатися, но на благочестие. Солнцу свое дело светити
лучами всю тварь, царя же добрыадетели еже миловати нишаа и обидныа. Светлийши
же того благоверный царь: солнце заходит приатием нощи, сей же не попущает
восхищен быти злым, но светом истинным обличает тайнаа неправды. Елико силою
всех превышьше еси, толма и делы подобает ти светити. Того ради и от Бога
похвален будеши и от добросмышлених прославен и с венцем непобедимаго твоего
царствиа имеа венець, еже на нищих милость. Риза есть не обетщающиа милостыня
одежда, нетленно одеание, якоже к нищим любы хотящему благоверно царствовати,
таковыми одеании душу украсити и небеснаго царствиа сподобити, благочестивое
ваше царство милостынями огражено и молитвами усыновлено непобедимо бывает
вражьими оружии.
Подобает
же ти, благочестивий царю всяк тщаниа и о благочестии имети и сущих под тобою о
треволнениа спасати, душевна и телесная, и душевное бо есть треволнение
еретичьское учение, телесное же есь треволнение - татьба и разбойничество,
хищение, и неправда, и обиды, и прочаа злаа дела, иже убо телесне врежають, а
не душевые.
Ты же
убо, о дръжавнм царю, и скыпетр царствиа приим от Бога блюди, како угодиши
давшему ти то, не токмо бо о себе ответ даси ко господу, но еже и инии зло
творят, ты слово отдаси Богу, волю дав им. Царь убо естеством подобен есть всем
человеком, а властию же подобен есть вышняму Богу. Но якоже Бог хощет всех
спасти, такоже и царь все подручное ему да хранит, яко да Божию волю сътворив,
приимеши от Бога присносущное радование и воцаришися с ним во векы радуася.
|