Первая договорная грамота Новгорода и Великого князя Ярослава Ярославича

Благословение от владыкы, поклон от посадника Михаила, и от тысяцьскаго Кондрата, и от всех соцьскых, и от всех старейших, и от всего Новагорода к князю Ярославу.

1. На семь ти, княже, хрьст целовати, на цем то целовал [хрьст] отець твои Ярослав.

2. Держати ти Новъгород по пошлине, како держал отець твои.

3. Грамот ти, княже, не посужати.

4. А мужа ти без вины волости не лишати.

5. А бес посадника ти, княже, волостии не роздавати, ни грамот даяти.

6. А волостии ти, княже, новгородьскых своими мужи не держати. А дар от тех волостии имати.

7. А се волости новгородьскые: Волок с всеми волостьми, а держати ти свои тивун на половине, а новгородець на половине в всей волости Волоцьскои. А в Торожку, княже, держати тивун на своей чясти, а новгородець на своей чясти.

8. А Городець, княже, дал Дмитрии с новгородци Иванку, а того ти, княже, не отъяти.

9. А се волости новгородьскые: Бежиче, Городець, Мелечя, Шипино, Егна, Вологда, Заволоцье, Колоперемь, Тре, Перемь, Югра, Печера. А ты волости дьржати мужи новгородьскыми; а дар от них имати.

10. А свиньи ти бити за 60 верст от города.

11. А закладников ти, княже, не приимати, ни твоей княгыни, ни твоим бояром.

12. Ни сел ти держати по Новгородьскои волости, ни твоей княгыни, ни боярам твоим, ни твоим дворянам; ни свобод ставити по Новгородьскои волости.

13. А и Суждальскои ти земле Новагорода не рядити, ни волостии ти не роздавати.

14. А на Озвадо ти, княже, ездити лете звери гонит. А в Русу не ехати, ехати ти в Русу на третиюю зиму.

15. А в Ладогу, княже, ехати на третиее лето.

16. А осетрьнику твоему ездити в Ладогу по отца твоего грамоте.

17. А куда пошло судии твоему ездити по волости, ехати им межень по Петрове дни.

18. А что твои брат отъял был пожне у Новагорода, а того ти, княже, отступитися; что новгородцев, то новгородьцем; а что пошло князю, а то княже.

19. А вывод ти, княже, в всей волости Новгородьскои не надобе.

20. А дворяном твоим, княже, ходити по пошлине, како пошло исперва.

21. А от новгородьця и от новоторжьця у мыта имати от воза по 2 векши и от хмелна короба.

22. А за Волок ти своего мужа не слати, слати новгородца.

23. На том ти на всемь хрьст целовати по любъви, без всякого извета, в правьду, при наших послех.