Страница 2 из 3
Вторая
договорная грамота Новгорода и Великого князя Ярослава Ярославича
Около
1266—1267 гг.
Благословение
от владыкы, покланяние от посадника Михаила, и от тысяцьскаго Кондрата, и от
всего Новагорода, и от всех старейших, и от всех меньших к князю Ярославу.
На семь,
княже, целуй хрьст и всему Новугороду, на цемь то целовали деди, и отци, и
отець твои Ярослав.
2.
Новъгород ти держати в старине, по пошлине.
3. Что
волости и всех новгородьскых, того ти, княже, не держати своими мужи, нъ
дьржати мужи новгородьскыми; а дар имати тобе от тех волостии.
4. А бес
посадника тобе волости и не раздавати.
5. А кому
раздаял волости брат твои Александр или Дмитрии с новгородци, тобе тех волостии
без вины не лишати.
6. А что
ти, княже, пошло на Торжку и на Волоце тивун свои дьржати: на своей чясти
дьржати, а новъгородьць на своей чясти дьржати.
7. А в
Бежицах, княже, тобе, ни твоей княгыни, ни твоим бояром, ни твоим дворянам сел
не дьржати, ни купити, ни даром приимати, и по всей волости Новгородьскои.
8. А се,
княже, волости новгородьскые: Волок с всеми волостьми и Торжок, Бежице, Городец
Палиц, а то есме дали Иванкови, потом Мелечя, Шипино, Егна, Вологда, Заволоцье,
Тре, Перемь, Печера, Югра.
9. А в
Русу ти, княже, ездити осень, а лете не ездити, ездити на Озвадо звери гонит.
10. А в
Ладогу ти, княже, слати осетрьник и медовара по грамоте отця своего Ярослава.
11. А
суд, княже, отдал Дмитрии с новгородци бежичяном и обонижаном на 3 лета, судье
не слати.
12 А из
Бежиць, княже, людии не выводити в свою землю, ни из иной волости
Новгородьскои, ни грамот им даяти, ни закладников приимати ни княгыни твоей, ни
бояром твоим, ни дворяном твоим: ни смерда, ни купцины.
13. А без
вины ти мужа волости не лишити.
14. А
грамоты ти, княже, не посуживати.
15. А
пожне, княже, что пошло тобе и твоим мужем, то твое. А что был отъял брат твои
Александр пожне, а то ти, княже, не надобе.
16. А
что, княже, брат твои Александр деял насилие на Новегороде, а того ся, княже,
отступи.
17.
Дворянам твоим и тивуним погон имати, како то пошло.
18. А на
том ти, княже, на всемь хрьст целовати бес перевода, при наших послех; а мы ти
ся, господине княже, кланяем.
19. А
что, княже, мыт по твоей земли, и по иной волости, и по всей Суждальскои земли,
а то, княже, имати по 2 векши от лодье, и от воза, и от лну, и от хмелна
короба.
20 А
дворянам твоим по селом у., купце в повозов не имати, разве ратной вести.
21. Тако,
княже господине, пошло от дед и от отець, и от твоих и от наших, и от твоего
отчя Ярослава.
|