Страница 3 из 3
Третья
договорная грамота Новгорода и Великого князя Ярослава Ярославича
Около
1270 гг.
Благословение
от владыкы, поклон от посадника Павше, и от всех старейших, и от всех меньших,
и от всего Новагорода к господину князю Ярославу.
1. На
семь, княже, целуй хрьст к всему Новугороду, на цемь то целовали деди и отець
твои Ярослав.
2.
Новгород ти держати в старине, по пошлине.
3. Что
волостии всех новгородьскых, тех волостии, княже, не держати ти своими мужи, нъ
держати мужи новгородьскыми; а дар, княже, тобе имати от тех волостии.
4. А бес
посадника ти, княже, суда не судити, ни волости раздавати, ни грамот ти даяти.
5. А кому
волости роздаял Дмитрии с новгородци и Александр, брат твои, тех волостии тобе
без вины не лишати.
6. А что
ти, княже, пошло на Торожку и на Волоче: тивун свои дьржати на своей чясти, а
новгородець на своей чясти.
7. А в
Бежичях тобе, княже, ни твоей княгыни, ни твоим боярам, ни твоим слугам сел не
держати, ни купити, ни даром приимати, и по всей волости Новгородьскои.
8. А се,
княже, волости новгородьскые: Волок с всеми волостьми, Торжок, Бежиче, Городець
Палиць, Мелечя, Шипино, Егна, Заволочье, Тре, Перемь, Печера, Югра, Вологда.
9. А в
Русу ти, княже, ездити на третиюю зиму. А лете, княже, ездити на Озвадо звери
гонит.
10. А в
Ладогу, княже, слати осетрьник и медовара по грамоте отца своего Ярослава; а ту
грамоту, княже, отъял еси, а та грамота, княже, дати ти назад.
11. А в
Ладогу, княже, ездити на третиее лето.
12. А из
Бежиць, княже, людии не выводити в свою волость, ни из иной волости
новгородьскои, ни грамот им даяти, ни закладников приимати ни твоей княгыни, ни
бояром твоим, ни слугам твоим: ни смерда, ни купцины.
13. А …
ти, княже, мужа без вины не лишати волости.
14. А
грамот ти не посужати.
15. А
пожне, княже, что твое и твоих мужь пошло, то твое и твоих мужь. А что был
отъял брат твои Александр пожне, то ти не надобе.
16. А
что, княже, грамоты посудил еси отца своего и брата своего, а свое грамоты
подаял еси на ты грамоты, ты грамоты отъимати, а старые оправливати.
17. А
что, княже, брат твои Александр деял насилие на Новегороде, того ти ся
отступити.
18. А
дворяном твоим, како пошло, погон имати: от князя по 5 кун, а от тивуна по 2
куне.
19. А
что, княже, мыт по Суждальскои земли и в твоей волости: от воза имати по 2
векши, и от лодье, и от хмелна короба, и от лняна.
20. А
дворянам твоим у купчев повозов не имати, разве ратной вести.
21. А
свобод ти, ни мыт на Новгородьскои волости не ставити.
22. А на
Имоволозьском погосте куны ти имати и на Важаньском.
23. А что
еси, княже, отъим у Кюрили Хотуниче, дал еси попу святаго Михаила, а городискым
попом не пошло дани им ти на новгородьском погосте, вдаи опять.
24. А
холоп или роба почнеть вадити на господу, тому ти веры не яти.
25. А на
Низу, княже, новгородца не судити, ни дании ти раздавати.
26. А
что, къняже, тобе было гнева на посадника и на всь Новгород, то ти, княже, все
нелюбье отложите и от мала и от велика, не мщати ти ни судомь, ни чим же.
27. А кто
почнеть вадити к тобе, тому ти веры не яти.
28. А про
послы, княже, и про купче новгородьскые, что в Костроме и по иным городом, то,
исправив, пусти в Новъгород с товаром.
29. А в
Немецьском дворе тобе торговати нашею братиею; а двора ти не затваряти; а
приставов ти не приставливати.
30. А про
полон, кто кде заточен, или человек, или конь русьскыи и новгородьскыи, то
исправи.
31. А
село святой Софии исправи к святой Софии.
32. А до
владыкы, отча нашего, гнева ти не держать.
33. На
том, господине, на всемь крьст целуй к всему Новугороду.
34. А гости
нашему гостити по Суждальскои земли без рубежа, по цесареве грамоте.
35. А
судье слати на Петров день, тако пошло.
36. А
вывода ти, княже, межи Суждальскою землею и Новъмьгородом не чинити.
37. А что
закладников за Гюргемь на Торожку или за тобою, или за княгынею, или за мужи
твоими: кто купець, тот в сто; а кто смерд, а тот потягнеть в свои погост; тако
пошло Новегороде, отпустите их проць.
Памятники
русского права. Вып. П. Памятники права феодально-раздробленной Руси XII—XV вв.
М., 1953. С. 135—141.
Только зарегистрированные пользователи могут оставлять комментарии. Пожалуйста авторизируйтесь или зарегистрируйтесь. Powered by AkoComment 2.0!
|