Страница 1 из 5
Единственная
духовная грамота Ивана Грозного дошла только в позднем списке. Вместе с
документом публикуются примечание и вступление переписчика.
ДУХОВНАЯ
ЦАРЯ И ВЕЛИКАГО КНЯЗЯ ИОАННА ВАСИЛЬЕВИЧА, САМОДЕРЖЦА ВСЕРОССИЙСКАГО.
Во
имя отца, и сына, и святаго духа, святыя и живоначальныя Троицы, и ныне, и
присно, и во веки веков, аминь, и по благословению отца нашего Антония,
митрополита всея России, се аз, многогрешный и худый раб Божий Иоанн, пишу сие
исповедание своим целым разумом. Но понеже разума нищетою содержим есмь, и от
убогаго дому ума моего не могох представити трапезы, пищи ангельских словес
исполнены понеже ум убо острюпись, тело изнеможе, болезнует дух, струпи телесна
и душевна умножишася, и не сущу врачу, исцеляющему мя, ждах, иже со мною поскорбит,
и не бе, утешающих не обретох, воздаша ми злая возблагая, и ненависть за
возлюбление мое. Душею убо осквернен есмь и телом окалях. Яко же убо от
Иерусалима божественных заповедей и ко ерихонским страстем пришед, и житейских
ради подвиг прелстихся мира сего мимотекущею красотою; яко же к мирным
гражданам привед, и багряницею светлости и златоблещанием предахся умом, и в
разбойники впадох мысленныя и чувственныя, помыслом и делом; усынения благодати
совлечен бых одеяния, и ранами исполумертв оставлен, но паче нежели возмнитися
видящым, но аще и жив, но Богу скаредными своими делы паче мертвеца смраднеиший
и гнуснеиший, его же иереи видев, не внят, Левит и той возгнушався, премину
мне. Понеже от Адама и до сего дни всех преминух в беззакониях согрешивших, сего
ради всеми ненавидим есмь, Каиново убийство прешед, Ламеху уподобихся, первому
убийце, Исаву последовах скверным невоздержанием, Рувиму уподобихся,
осквернившему отче ложе, несытства и иным многим яростию и гневом
невоздержания. И понеже быти уму зря Бога и царя страстем, аз разумом растленен
бых, и скотен умом и проразумеванием, понеже убо самую главу оскверних желанием
и мыслию неподобных дел, уста разсуждением убийства, и блуда, и всякаго злаго
делания, язык срамословия, и сквернословия, и гнева, и ярости, и невоздержания
всякаго неподобнаго дела, выя и перси гордости и чаяния высокоглаголиваго
разума, руце осязания неподобных, и грабления несытно, и продерзания, и
убийства внутрення, ея же помыслы всякими скверными и неподобными оскверних,
объядении и пиянствы, чресла чрезъестественная блужения, и неподобнаго
воздержания и опоясания на всяко дело зло, нозе течением быстрейших ко всякому
делу злу, и сквернодеяниа, и убивства, и граблением несытнаго богатства, и иных
неподобных глумлений. Но что убо сотворю, понеже Авраам не уведе нас, Исаак не
разуме нас, и Израиль не позна нас! Но ты, Господи, отец наш еси, к тебе
прибегаем, и милости просим, иже не от Самарии, но от Марии Девы неизреченно
воплотивыйся, от Пречистых тя ребр воде и крови, яко масло, возлияв, Христе,
Боже, язвы струп моих глаголюще душевныя и телесныя, обяжи и к небесному
сочетай мя лику; яко милосерд, Господи, Боже мой, мир даждь нам, разве тебе
иного не знаем, и имя твое разумеем; просвяти лице твое на ны и помилуй ны.
Твоя бо есть держава неприкладна, и царство безначално и безконечно, и сила, и
слава, и держава, ныне, и присно, и во веки веков, аминь. И понеже, по писанию,
не должни суть хранити имения чада родителям, но родителие чадам, и яже убо
вышнее имение, яко же реченно: «премудрость во исходящих поется, на краех же
забралных мест проповедается, при вратех же сильных дерзающи глаголет, се
предлагаю вам глас мой, сыновом человеческим, лучше бо ту куповати, паче злата
и сокровища многа, честнейшии же суть камения многоценна, все честное
недостойно ея есть». Глаголет Господь: «мною царие царствуют и сильнии пишут
правду». Сего ради и аз предлагаю учения, елико мой есть разум, от убожества
моего, чадца моя, благодать и Божий дар вам. Се заповедаю вам, да любите друг
друга, и Бог мира да буди с вами. Аще бо сия сохраните, и вся благая
достигните; веру к Богу тверду и непостыдну держите, и стоите, и научитися
божественных догматов, како веровати, и како Богу угодная творити, и в какове
оправдании пред нелицымерным судиею стати. То всего больше знайте: православную
христианскую веру держите крепко, за нее страждите крепко и до смерти. А сами
живите в любви. А воинству, поелику возможно, навыкните. А как людей держати, и
жаловати, и от них беречися, и во всем их умети к себе присвоивати, и вы б тому
навыкли же. А людей бы есте, которыя вам прямо служат, жаловали и любили, их
ото всех берегли, чтобы им изгони ни от кого не было, и оне прямее служат. А
каторыя лихи, и вы б на тех опалы клали не вскоре, по разсуждению, не яростию.
А всякому делу навыкайте, и божественному, и священническому, и иноческому, и
ратному, и судейскому, московскому пребыванию, и житейскому всякому обиходу, и
как которыя чины ведутся здесь и в ыных государствах, и здешнее государство с
иными государствы что имеет, то бы есте сами знали. Также и во обиходе во
всяких, как кто живет, и как кому пригоже быти, и в какове мере кто держится,
тому б есте всему научены были. Ино вам люди не указывают, вы станите людям
указывати. А чего сами не познаете, и вы сами стате своими государствы владети
и людьми.
А
что, по множеству беззаконий моих, Божию гневу распростершуся, изгнан есмь от
бояр, самоволства их ради, от своего достояния, и скитаюся по странам, а може
Бог когда не оставит, и вам есми грехом своим беды многия нанесены, Бога ради,
не пренемогайте в скорбех, возвержите на Господа печаль свою, и той вас
препитает, по пророку глаголющу: «отец мя и мати остависта, Господь же
восприимет, понеже бо вся в руце Господеви, яко чаша уклони от сия, в сию
смиряет, а сего возносит, никто же бо приемлет честь от себе, но званный от
Бога, дает бо власть, ему же хощет, и воздвизает от земли убога и от гноища
возносит нища, посадити его с князи людей, и престол славы наследует ему».
А
докудова вас Бог помилует, свободит от бед, и вы ничем не разделяйтесь, и люди
бы у вас заодин служили, и земля бы заодин, и казна бы у вас заодин была, ино
то вам прибылняе. А ты, Иван сын, береги сына Федора, а своего брата, каксебя,
чтоб ему ни в каком обиходе нужды не было, а всем бы был исполнен, чтобы ему на
тебя не в досаду, что ему не дашь удела и казны. А ты, Федор сын, Ивана сына,
своего брата старейшаго, докудова строитель, уделу и казны не прося, а в своем
бы еси обиходе жил, смечаясь, как бы Ивану сыну не убыточнее, а тебя б льзе
прокормити было, и оба вы есте жили заодин и во всем устроивали, как бы
прибыточнее. А ты бы, сын Иван, моего сына Федора, а своего брата молодшаго,
держал, и берег, и любил, и жаловал его, и добра ему хотел во всем так, как
себе хочешь, и на его лихо ни с кем не ссылался, а везде бы еси был с Федором
сыном, а своим братом молотшим, и в худе и в добре, один человек, занеже
единородныя есть у матери своей.
И
вы бы сами о себе прибежище положили, яко же рече Христос во святом евангелии:
«иде же собрани аще два или три во имя мое, ту есмь аз посреде их». И аще
Христос будет посреде вас для вашея любви, и никто может вас поколебати, вы
будете друг другу стена, и забрало, и крепость. К кому ему прибегнуть и на кого
уповать! Ты у него отец, и мать, и брат, и государь, и промысленник. И ты б его
берег, и любил, и жаловал, как себя. А хотя буде в чем пред тобою и проступку
какую учинит, и ты его понаказал и пожаловал, а до конца б его не разорял, а
ссоркам бы еси отнюдь не верил, занеже Каин Авеля убил, а сам не наследовал же.
А
Бог благоволит вам, тебе быть на государстве, а брату твоему Федору на уделе, и
ты б удела его под ними не подъискивал, а на него лиха ни с кем ни ссылался.
А
где по рубежам сошлась твоя земля с его землею, и ты б его берег и накрепко бы
еси смотрел правды, а напрасно бы еси не задирался, а людским бы вракам не
потакал, занеже, аще кто и множество земли приобрящет и богатства, а трилакотна
гроба не может избежати, и тогды то все останется, по Господней притчи, — ему
же угобзися нива, иже хотяше разорити житницы и болшая создати, к нему же рече
Господь: «безумне, в сию нощь душу твою истяжут от тебе, а яже уготова, кому
будет?».
А
ты б любовь нелицемерную держал к брату своему, а к моему сыну Федору, яко же
рече божественный апостол Павел: «любы не завидит, любы не гордится, любы не
злообразуется, не вменяет злое, не радуется о неправде, радуется же о истинне,
все уповает, вся терпит, любы николи же отпадает»; яко же рече той же апостол:
«аще кто о ближних своих не промышляет, веры отверглся, и есть невернаго горши».
А
ты, сыне мои Федор, держи сына моего Ивана в мое место, отца своего, и слушай
его во всем, как мене, и покорен буди ему во всем, и добра хоти ему, как мне,
родителю своему, во всем, и во всем бы еси Ивану сыну непрекословен был так,
как мне, отцу своему, и во всем бы еси жил так, как из моего слова. А будет
благоволит Бог ему на государстве быти, а тебе на уделе, и ты б государства его
под ним не подыскивал, и на ево лихо не ссылался ни с кем, а везде бы еси с
Иваном сыном был в лихе и в добре один человек. А докуды, и по грехом, Иван сын
государства не доступит, а ты удела своего, и ты бы с сыном Иваном вместе был
заодин, и с его бы еси изменники и с лиходеи никоторыми делы не ссылался. А
будут тебе учнут прельщать славаю, и богатством, и честию, или учнут тебе
которых городов поступать, или повольность которую учинят, мимо Ивана сына, или
на государство учнут звати, и ты б отнюдь того не делал и из Ывановой
сыновниной воли не выходил; как Иван сын тебе велит, так бы еси был, а ни на
что бы еси не прельщался. А где тебя Иван сын пошлет на свою службу или людей
твоих велит тебе на свою службу послати, и ты б на его службу ходил и людей
своих посылал, как коли сын мой Иван велит.
А
где по рубежам Иванова сыновня земля сошлась с твоею землею, и ты б берег того
наикрепко, смотрел бы еси правды, а напрасно бы еси не задирался, и людским бы
еси вракам не потакал, занеже аще кто множество богатства или земли
приобрящеть, а трилакатнаго гроба не может избежати, и тогда то все останется,
токмо едина дела, что сотворихом, благо ли, или зло.
И
ты б сына моего Ивана, а своего брата старейшаго, держал в мое место, отца
своего, честно и грозно, и надежду бы еси держать во всем на Бога да на него, и
ни в чем бы еси ему не завидел, занеже единородные есте у своей матери. И вы б
сами себе прибежище положили, яко же рече Христос во святом евангелии: «иде же
собрани два или три во имя мое, то есмь и аз посреде их». И аще Христос будет
посреди вас для вашия любьви, нно кто может вас поколебать! Он тебе стена, и
забрало, и рать, и крепость. К кому тебе прибегнуть и на кого уповать! Он тебе
отец, и мать, и брат старейший, и государь, и промысленик.
И
ты б, Федор сын, сыну моему Ивану, а своему брату старейшему, во всем покорен
был, и добра ему хотел и во всем так, как мне и себе, и во всем воли его буди,
до крови и до смерти, ни в чем ему не прикослови. А хотя будет на тебя Иванов
сыновен гнев или обида в чем ни будь, и ты бы сыну моему Ивану, а своему брату
старейшему, непрекословен был, и рати никакой ни вчинял, и собою ничем не
боронился, а ему еси бил челом, чтоб тебя пожаловал, гнев свой сложить изволил,
и жаловал тебя во всем по моему приказу. А в чем будет твоя вина, и ты б ему
добил челом, как ему любо, и послушает челобитья, ино добро, а не послушает, и
ты б собою не оборонялся ж, а всем бы еси печаль на радость преложа, положил на
Бога, занеже всяким неправдам местник есть Бог.
|